- This event has passed.
Mirentxu Loyarteren ondarea: hitzaldi irudikatua Iratxe Fresnedaren eskutik
Apirila 23 // 4:00 PM > 5:00 PM
3,95€
(H)emen eta CIMA elkarteek elkarlanean antolatutako jarduera hau Punto de Vista jaialdiaren LAN saileko programaren baitan kokatzen da. Ekitaldiak Mirentxu Loyarteren ondarea jartzen du erdigunean, euskal-nafar dokumentalgintzaren aitzindaria izan zen zinemagilea.
Iratxe Fresneda ikertzaile eta zinemagileak, Irrintziaren oihartzunak (2016) lanaren egilea, hitzaldi irudikatu bat eskainiko du. Saioak Loyarteren ibilbidea eta ekarpena berreskuratzea eta balioan jartzea du helburu.
Ekitaldian, gainera, Irrintzi (Mirentxu Loyarte, 1978) filmaren proiekzioa egingo da, eta ondoren solasaldia izango da Iratxe Fresnedarekin, Miquel Martí Freixas (jaialdiko zuzendari artistikoa) eta Teresa Morales de Álava (jaialdiko zuzendari exekutiboa) lagun.
Iratxe Fresneda
Iratxe Fresneda ikertzailea eta zinemagilea da, ikus-entzunezko ikerketaren eta praktika profesionalaren arteko elkargunean lan egiten duen sortzailea. EHUko irakaslea da, eta bere lanak, “ahaztutako artxiboetan” inspiratuta, ez-fikziozko zinemaren eremua jorratzen du begirada pertsonal batetik.
Bere lehen film luzea, Irrintziaren oihartzunak (2016), Donostiako Zinemaldian estreinatu zen, eta ondoren etorri ziren Lurralde hotzak (2018) eta Tetuán (2022). Bere azken lan laburra, Errotatiba (2024), Kimuak 2025 katalogoan hautatua izan da eta nazioartean aurkeztu da. Gaur egun, Bide guztiak bere azken film luzea garatzen ari da.
Sarrerak: 3,95€ Hemen salgai
